Presidenti i përkohshëm i Sirisë ka thënë se është prioritet i tij që t`i mbrojë qytetarët druzë të vendit, pasi Izraeli u zotua se do t`i shkatërrojë forcat qeveritare që i akuzoi për sulmin ndaj anëtarëve të pakicës fetare në provincën Suweida.
Në deklaratën e tij të parë televizive që nga sulmet ajrore të Izraelit në Damask të mërkurën, Ahmed al-Sharaa paralajmëroi gjithashtu se sirianët nuk kishin frikë nga lufta. Media shtetërore siriane raportoi se ushtria po tërhiqej nga Suweida sipas një marrëveshjeje armëpushimi me udhëheqësit druzë. Por nuk është e qartë nëse kjo do të zgjasë. Më shumë se 350 persona raportohet të jenë vrarë që kur përplasjet sektare midis milicive druze dhe fiseve beduine shpërthyen në provincë të dielën.
Qeveria u përgjigj duke vendosur forcat e saj në qytetin kryesisht druz të Suweidës. Megjithatë, luftimet u përshkallëzuan dhe forcat qeveritare u akuzuan nga banorët dhe aktivistët për vrasjen e civilëve druzë dhe kryerjen e ekzekutimeve jashtëgjyqësore. Feja Druze është një degëzim i Islamit Shiit me identitetin dhe besimet e veta unike. Përveç Sirisë, ka komunitete të konsiderueshme Druze në Liban, Jordani, Izrael dhe në Lartësitë e pushtuara të Golanit. Frika e tyre është rritur nga disa shpërthime dhune vdekjeprurëse sektare, përfshirë një në maj midis milicive Druze, forcave të sigurisë dhe luftëtarëve aleatë islamistë që gjithashtu nxiti Izraelin të ndërhynte ushtarakisht.
Në fjalimin e tij herët të enjten, Sharaa theksoi se Druzët ishin “një pjesë themelore e strukturës së këtij kombi”. Presidenti tha se forcat qeveritare të vendosura në Suweida kishin “arritur të rivendosnin stabilitetin dhe të dëbonin fraksionet e jashtëligjshme pavarësisht ndërhyrjeve izraelite”, të cilat ai tha se shkaktuan një “ndërlikim të konsiderueshëm të situatës” dhe “një përshkallëzim në shkallë të gjerë”.
Të mërkurën, kryeministri i Izraelit, Benjamin Netanyahu, u tha qytetarëve druzë të vendit se forcat izraelite po “vepronin për të shpëtuar vëllezërit tanë druzë dhe për të eliminuar bandat e regjimit”. Sekretari i Shtetit i SHBA-së, Marco Rubio, tha se po bisedonte me të gjitha palët e përfshira dhe se ishte “rënë dakord për hapa specifikë që do t’i jepnin fund kësaj situate shqetësuese dhe të tmerrshme”.
