Një nga temat më të rëndësishme që do të trajtojë lideri i Lidhjes Social Demokrate (LSDM) Venko Filipçe gjatë vizitës së tij në Berlin, Republikën Federale të Gjermanisë sot, ku do të marrë pjesë në Kongresin e Partisë Social Demokrate Gjermane (KPSDGj), është Raporti i Progresit i Parlamentit Evropian për vendin dhe amendamenti i propozuar në të cilin termi “gjuhë dhe identitet maqedonas” i shtohet termit “moderne”.
Filipçe do të përcjellë qëndrimin e partisë së tij për këtë çështje në takimet e planifikuara dypalëshe me përfaqësuesit e partive socialdemokrate në Evropë.
Takimi kryesor është me zv/kancelarin aktual të Gjermanisë dhe ministrin Federal të Financave, Lars Klingbeil, i cili është edhe bashkëkryetar i SPD-së, partisë simotër të LDSM-së në Gjermani.
“Një nga temat më të rëndësishme është Raporti i PE-së për Maqedoninë. Në të kaluarën, LSDM, me diplomaci të mençur, arriti të refuzojë të gjitha përpjekjet për të përcaktuar identitetin dhe gjuhën në negociata dhe raporte. LSDM siguroi që gjuha dhe identiteti maqedonas në BE do të jenë të pastra, të njohura dhe pa asnjë shtesë. Ne kurrë nuk kemi devijuar nga vijat tona të kuqe. Megjithatë, vetëm pas një viti të qeverisjes së VMRO-DPMNE-së, ky qëndrim është shkelur”, thotë Venko Filipçe
Sipas tij, nuk duhet të lejohet të miratohet një Raport në të cilin gjuha do të shtohet me shtesën “moderne”, dhe se gjuha dhe identiteti nuk kanë qenë dhe nuk duhet të jenë kurrë subjekt i sqarimeve të mëtejshme, sepse ato janë të përcaktuara qartë në të gjitha dokumentet e Bashkimit Evropian.
Lideri i opozitës thotë se gjuha maqedonase është tashmë një nga gjuhët e Unionit, e pastër, pa shtesa dhe duhet të mbetet e tillë.
“Sot, në takimet në Berlin, do të mbroj qëndrimet e Maqedonisë. LSDM ka lobuar dhe luftuar fuqishëm që nga fillimi që amendamenti për gjuhën dhe identitetin të mos jetë pjesë e Raportit, dhe në dy javët e ardhshme do të bëjmë çmos që të përsërisim suksesin e viteve të kaluara kur i ndaluam me sukses përpjekje të tilla”, tha ai
Ai theksoi se megjithëse partia në pushtet paraqitet si mbrojtëse e çështjeve të identitetit, nuk e tregon këtë në veprim.
Ai i tha VMRO-DPMNE-së se janë plotësisht të hapur dhe të gatshëm për bashkëpunim, me qëllim që të bashkojnë forcat dhe më në fund të tregojnë së bashku se cilat janë vijat e kuqe për Maqedoninë.
Më 24 qershor Komiteti i Punëve të Jashtme i Parlamentit Evropian (AFET) miratoi Raportin për Maqedoninë e Veriut për vitin 2023 dhe 2024, të përgatitur nga eurodeputeti austriak dhe raportuesi për vendin, Thomas Weitz. Dokumenti përmban referenca për njohjen e gjuhës dhe identitetit maqedonas në disa vende.
Para votimit, eurodeputeti gjerman Michael Galler nga CDU, ose Partia Popullore Evropiane, propozoi një amendament që do të shtonte fjalën “modern” para termit “gjuhë dhe identitet maqedonas”. Amendamenti nuk u vu në votim sepse gjashtë eurodeputetë votuan kundër tij.
Përndryshe, Maqedonia e Veriut duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë.
Kjo vjen si rezultat i asaj që Maqedonia e Veriut pas 17 vitesh më 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik të viti 2022.
Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.
Ndryshimi i Kushtetutës kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime. (Portalb.mk)
