Qeveria ka arritur të marrë eurobondin 650 milionë euro në bursën angleze me normë interesi 5 për qind. Ministria e Financave sqaron se borxhi i marrë duhet të shlyhet për 10 vite, pasi maturohet në 2035-ën.
Norma fillestare e eurobondit ka qenë 5.5 për qind thotë Ministria e Financave por për shkak të ofertës më të lartë se kërkesa pasi ishin 195 investitorë të interesuar për këtë emetim edhe norma e interesit është ulur.
“Ministria e Financave, vlerëson se emetimi i Eurobondit ka një rëndësi të veçantë, jo thjesht vetëm për sigurimin e likuiditetit, por edhe sepse siguron prezencën e vendit tonë në tregjet ndërkombëtare të kapitalit dhe mat besimin e investitorëve në obligacionet e emetuara nga shteti shqiptar. Kjo nënkupton kredibilitetit afatgjatë të ekonomisë shqiptare në tërësi dhe financave publike në veçanti”.
Ndikim në rritjen e imazhit të Shqipërisë përpara investitorëve të huaj ministria e thotë se ka pasur përmirësimi i vlerësimeve ndërkombëtare për ekonominë, për menaxhimin e borxheve por edhe përparimi i vendit drejt integrimit në BE.
“Raporti i mbulimit ndër më të lartët të arritur, prej 4.3 herë dhe më i larti ndër emetimet e vendeve të Evropës Qendrore dhe Lindore, që nga tetori 2024”.
