Që nga e shtuna rrugët që çojnë në pikat kufitare Bërnjak dhe Jarinje janë bllokuar nga serbët.
Kjo për shkak të arrestimit të një ish-polici serb i cili dyshohet se sulmoi policinë në Zveçan të enjten pak para mesnatës.
E kjo gjendje e ka tërhequr vëmendjen e mediumit amerikan CNN.
Gjigandi mediatik në SHBA i ka kushtuar një artikull gjendjes në veri me titullin “Kosova bën thirrje për ndërhyrje të NATO-s pas fundjavës së dhunshme mes tensioneve etnike në rritje”.
“Javët e fundit, minoriteti serb në veriun e Kosovës, i është përgjigjur lëvizjeve të Prishtinës që ata i shohin si anti-serbe”.
Gjatë së dielës, kryeministri i Kosovës, Albin Kurti, i bëri thirrje forcave paqeruajtëse të KFOR-it që të ndërhyjnë në veri.
“Kryeministri i Kosovës iu bëri thirrje trupave paqeruajtëse të NATO-s që të ndërhyjnë pasi protestuesit e pakicës serbe bllokuan rrugët dhe persona të armatosur të panjohur shkëmbyen zjarr me policinë gjatë fundjavës mes tensioneve etnike në rritje në veriun e trazuar të vendit”, shkruan CNN.
Kurti i kërkoi atyre të garantojnë “lirinë e lëvizjes”, pasi ai akuzoi “bandat kriminale” për bllokimin e rrugëve.
Tutje, në artikullin e CNN-it përmendet edhe sulmi me granatë ndaj policëve të EULEX-it.
Si shkak i situatës autoritetet e Kosovës i shtynë zgjedhjet në veri.
Presidentja Vjosa Osmani, mori vendim që ato të shtyhen për datën 23 prill.
Gjatë ditës së djeshme pati reagime të shumta nga Shtetet e Bashkuara të Amerikës, Britania e Madhe, Gjermania, e po ashtu edhe nga Bashkimi Evropian.
Derisa, presidenti i Serbisë, Aleksandar Vuçiq, të shtunën deklaroi do t’i kërkonte KFOR-it që ta lejonte Serbinë të vendoste ushtrinë dhe policinë në Kosovë, por pranoi se nuk kishte asnjë shans për t’u dhënë leje.
Të dielën, Vuçiq tha se Serbia kërkoi lirimin e të gjithë serbëve të arrestuar nga veriu i Kosovës, por gjithashtu kërkon të ulë tensionet në rajon.
Vuçiq akuzoi autoritetet në Prishtinë dhe kryeministrin e Kosovës Kurti për nxitje të tensioneve duke bërë “lëvizje të njëanshme”, shkruan CNN.
