Zvonko Veselinoviq, një nga figurat më të përfolura për ndikimin e tij në veri të Kosovës dhe lidhjet me qarqet e larta politike në Serbi, raportohet se është larguar mëngjesin e sotëm drejt Turqisë, në kohën kur autoritetet serbe po zhvillojnë arrestime të biznesmenëve dhe zyrtarëve të lidhur me strukturat politike të vendit.
Sipas informacioneve të publikuara në mediat serbe, Veselinoviç dyshohet se ka udhëtuar në orët e hershme të mëngjesit nga Sarajeva drejt Stambollit, duke përdorur dokumente udhëtimi të Serbisë.
Largimi i raportuar i tij vjen në një moment të ndjeshëm, teksa në Serbi po zhvillohen veprime të organeve të rendit ndaj personave që kanë pasur lidhje me qarqet e pushtetit dhe Partinë Progresive Serbe (SNS).
Megjithatë, deri më tani nuk ka konfirmim zyrtar nëse udhëtimi i Veselinoviçit lidhet me këto zhvillime apo nëse ndaj tij është ndërmarrë ndonjë veprim i ri hetimor.
