Bullgaria pret që Republika e Maqedonisë së Veriut të jetë e gatshme të formojë një narrativë politike që nuk është e drejtuar kundër Bullgarisë, tha ministrja e Punëve të Jashtme të Bullgarisë, Velislava Petrova-Çamova, në parlamentin bullgar.
Nuk është tipike të ketë një mediator midis një vendi anëtar të Bashkimit Evropian dhe një vendi kandidat, sipas marrëveshjeve që nuk janë të karakterit bilateral, por që janë miratuar dhe aprovuar në nivel evropian, deklaroi ministrja e Punëve të Jashtme të Bullgarisë, Velislava Petrova-Çamova, duke iu përgjigjur një pyetjeje deputeti në lidhje me mbajtjen e dialogut bilateral të nivelit të lartë midis përfaqësuesve të Bullgarisë dhe Maqedonisë për procesin e integrimit evropian.
– Ky është një qëndrim shumë i qartë i Bullgarisë. Bullgaria pret që Republika e Maqedonisë së Veriut të jetë e gatshme të formojë një narrativë politike që nuk është e drejtuar kundër Bullgarisë, tha Petrova-Çamova.
Shefi i diplomacisë maqedonase, Timço Mucunski, dje tha se dialogu që aktualisht po zhvillohet rreth çështjeve të hapura midis Shkupit dhe Sofjes ka mbështetje nga institucionet evropiane dhe vendet anëtare të Bashkimit Evropian. Ai theksoi se Maqedonia në këtë proces mbetet në pozicionet e saj të qarta dhe parimore.
– Sa i përket çështjes me Bullgarinë, mendoj se kemi thënë mjaft qartë se aktualisht po punojmë në një dialog për të cilin, siç dëgjuat nga përfaqësuesit e Bashkimit Evropian, kemi mbështetje si nga institucionet evropiane ashtu edhe nga vendet anëtare – deklaroi Mucunski, i pyetur për deklaratën e eurokomisareve për zgjerim Marta Kos se Unioni ndihmon në dialogun midis Maqedonisë dhe Bullgarisë.
Eurokomisarja Kos, në një konferencë për shtyp në Bruksel më 4 nëntor, tha se Komisioni Evropian bën shumë për marrëdhëniet midis dy vendeve, por nuk thotë gjithçka në lidhje me këtë.
Kryeministri Hristijan Mickoski së fundmi propozoi që përfaqësues nga BE të jenë mediatorë në dialogun midis Shkupit dhe Sofjes.
