Në Gjykatën Themelore Penale në Shkup sot vazhdon procesi gjyqësor për rastin “Lotaria Shtetërore”, në të cilin akuzohen ish-zëvendëskryeministri i parë, Artan Grubi, ish-drejtori i SHA-së “Lotaria Shtetërore”, Perparim Bajrami, si dhe gjashtë persona të tjerë.
Seanca e fundit u mbajt më 30 tetor, kur dëshmoi Andrej Krstevski, këshilltar për zbatimin e projekteve në “Lotarinë Shtetërore”, i cili më parë kishte qenë anëtar i Bordit Drejtues dhe Mbikëqyrës, si dhe zëvendësdrejtor i ndërmarrjes.
Ndërkohë, më 3 nëntor, Këshilli Penal i Gjykatës Themelore Penale në Shkup ia hoqi masën e paraburgimit Perparim Bajramit, duke pranuar garanci në pasuri të paluajtshme, të vlerësuar në 1.140.781 euro. Në vend të paraburgimit, atij iu caktuan masa kujdesi, ndër të cilat dorëzimi i dokumentit të udhëtimit dhe paraqitja e rregullt në gjykatë.
Përveç Grubit dhe Bajramit, në bankën e të akuzuarve janë edhe Bashkim Avdi, Metodija Dimovski, Skender Mehmeti, Bojan Janev, Fatmir Ramadanovski dhe Aleksandar Dimitrioski.
Aktakuzën e përfaqësojnë prokurorët publikë Daniel Kocev dhe Aleksandar Davçevski, ndërsa gjykimin e udhëheq gjykatësja Biljana Shuplinovska-Jovevski.
