Mijëra të rinj dolën të premten në rrugët e qyteteve zvicerane për të protestuar kundër riarmatimit, krizës klimatike dhe shkurtimeve në arsim. Ndërsa demonstratat në disa qytete u zhvilluan në mënyrë paqësore, në Bazel dhe Lozanë pati përleshje me policinë, kurse në Cyrih u arrestuan katër persona.
Sipas raportimeve të gazetarëve të agjencisë së lajmeve Keystone-SDA, protesta u mbajtën në rreth dhjetë qytete të Zvicrës, ku morën pjesë nxënës shkollash, praktikantë dhe studentë. Organizatorët vlerësuan se numri i pjesëmarrësve në nivel vendi arriti në 40 mijë.
Incidente dhe përleshje në Bazel
Situata u tensionua në Bazel pas një demonstrate të autorizuar, ku morën pjesë disa qindra persona.
Një grup personash të maskuar ngritën barrikada pranë Urës Wettstein, duke përdorur gardhe ndërtimi, kontejnerë mbeturinash dhe tabela rrugore. Barrikadat u larguan më pas nga policia.
Sipas policisë kantonale të Basel-Stadt, gjatë protestës pati disa incidente, përfshirë dëmtime materiale dhe sulme ndaj policëve me fishekzjarre, shishe, mjete piroteknike dhe llastiqe.
Për të parandaluar përshkallëzimin e situatës, policia ndërhyri disa herë duke përdorur topa uji, plumba gome dhe gaz lotsjellës.
Mijëra protestues në Bernë dhe Cyrih
Në Bernë, disa mijëra të rinj u mblodhën në Münsterplatz rreth orës 18:15 dhe marshuan nëpër qytet. Më herët gjatë pasdites, grupe nxënësish nga shkolla të ndryshme të mesme ishin mbledhur në Casinoplatz.
Demonstrata përfundoi rreth orës 19:30 pranë shkollës së hipizmit dhe u zhvillua pa incidente. Policia e shoqëroi marshimin me disa automjete, por në përgjithësi mbajti një profil të ulët.
Ndërkohë, në Cyrih morën pjesë rreth 3 mijë persona në grevën e autorizuar të të rinjve.
Para protestës, në rrjetet sociale kishin qarkulluar thirrje për dhunë, ndërsa organizatorët zyrtarë kishin bërë apel për demonstrim paqësor, transmeton Telegrafi.
Policia e qytetit dhe ajo kantonale kontrolluan identitetin e disa dhjetëra personave para dhe gjatë protestës.
Sipas njoftimit të policisë së qytetit të Cyrihut, katër persona u arrestuan për pengim të punëve zyrtare dhe pritet t’i dorëzohen prokurorisë publike. Gjithashtu, 29 persona u ndaluan përkohësisht dhe u dërguan në stacion policor për t’u marrë në pyetje, ndërsa rreth 60 personave iu kërkua të largoheshin nga zona.
Lozana me numrin më të madh të protestuesve
Protesta u mbajtën edhe në pjesën frëngjishtfolëse të Zvicrës dhe në Ticino. Mobilizimi më i madh u regjistrua në Lozanë, ku sipas Keystone-SDA morën pjesë 7 mijë deri në 8 mijë persona.
Policia kantonale vlerësoi numrin e pjesëmarrësve në 9 mijë deri në 10 mijë, ndërsa sindikatat dhanë një shifër prej 25 mijë personash.
Sipas vlerësimeve të Departamentit të Arsimit, rreth një e treta e nxënësve të shkollave të mesme në kantonin Vaud iu bashkuan mobilizimit. Demonstrata u zhvilluan në gjashtë nga 15 shkollat e mesme, ndërsa nuk pati protesta në shkollat profesionale dhe në arsimin e detyrueshëm.
Marshimi në Lozanë ishte paqësor deri në përfundimin e tij. Megjithatë, gjatë shpërndarjes së turmës, rreth 50 demonstrues të maskuar u përleshën me policinë pranë katedrales, duke përdorur fishekzjarre dhe bomba tymi. Policia reagoi me gaz lotsjellës dhe topa uji.
Në Gjenevë, afër një mijë persona u mblodhën në fund të pasdites për të shprehur pakënaqësinë ndaj sistemit. Ndërkohë, studentët e Shkollës së Artit dhe Dizajnit bllokuan një ndërtesë universitare, duke kërkuar heqjen e tarifave të shkollimit.
Disa qindra persona protestuan edhe në Neuchâtel, përcjell Telegrafi.
Në Bellinzona, rreth një mijë të rinj morën pjesë në një demonstratë paqësore, sipas policisë bashkiake. Në mesin e mesazheve të shfaqura në pankarta ishte edhe mbishkrimi në italisht: “Non esiste bomba pacifica”, që do të thotë “Nuk ka bomba paqësore”. Gjatë protestës nuk u raportuan incidente.
Protestat pjesë e një lëvizjeje ndërkombëtare
Demonstratat në Zvicër ishin pjesë e lëvizjes ndërkombëtare “Greva Rinore”, e formuar në fillim të vitit 2026.
Aleanca kishte bërë thirrje për protesta në institucionet arsimore në mbarë Evropën, ndërsa në Zvicër iu bashkuan të rinj nga më shumë se 65 institucione arsimore.
Thirrja për mobilizim u mbështet nga organizata të ndryshme, përfshirë Socialistët e Rinj, Të Gjelbrit e Rinj, lëvizjen e grevës për klimën dhe sindikata të ndryshme.
Përveç ndalimit të projekteve të armëve, protestuesit kërkuan edhe një javë pune prej 35 orësh, ushqim më të përballueshëm në institucionet arsimore dhe kushte më të mira pune për studentët.


