Institucionet shtetërore kanë 124 milionë euro borxh për rrymë, ujë, ngrohje dhe transport

Gjithsej 7.63 miliardë denarë, ose 124.06 milionë euro, janë detyrimet e vonuara dhe të papaguara të institucioneve sipas zërit buxhetor për shërbime komunale, ngrohje, komunikim dhe transport.

Si rezultat i borxhit të papaguar ndaj EVN-së, Fakulteti i Inxhinierisë Mekanike, Inxhinierisë Elektrike, Shkencave Natyrore e Matematikore dhe Bujqësisë, si dhe ndërtesa e Rektoratit të Universitetit “Shën Kirilit dhe Metodit” në Shkup, mbetën dje pa energji elektrike.

Sipas të dhënave të fundit nga Ministria e Financave për detyrimet e raportuara, zëri për shërbime komunale, ngrohje, komunikim dhe transport është i dyti më i madh në strukturën e borxhit total të vonuar dhe të papaguar në vend, i cili arrin në 43.841.062.661 denarë ose 712.86 milionë euro.

Ai paraprihet vetëm nga zëri për materiale dhe inventar të imët me një borxh të papaguar prej 149.90 milionë eurosh, ndërsa pasohet nga shpenzimet e tjera rrjedhëse me 81.14 milionë euro dhe shlyerja ndaj kreditorëve jorezidentë me 76.01 milionë euro.