Një aeroplan që sonte është nisur nga aeroporti i Beogradit “Nikola Tesla” drejt Moskës ka ndryshuar drejtimin e fluturimit dhe është kthyer në kryeqytetin serb. Sipas informacioneve jozyrtare, në mesin e udhëtarëve dyshohet se kanë qenë Aleksandar Vulin, Dušan Bajatović dhe Nenad Popović.
Fluturimi JU134 është nisur në orën 18:48 dhe ka arritur deri në hapësirën ajrore mbi jugun e Lituanisë, kur, sipas të njëjtave informacione, është dhënë urdhër për kthimin e tij. Si arsye jozyrtare përmenden shkaqe sigurie.
Pretendohet se urdhrin për kthimin e aeroplanit e ka dhënë drejtori për siguri korporative i aeroportit të Beogradit. Megjithatë, deri tani nuk ka konfirmim zyrtar për këtë pretendim, për arsyen konkrete të kthimit apo për identitetin e udhëtarëve.
Aleksandar Vulin është kryetar i Lëvizjes së Socialistëve, Dušan Bajatović drejtor i kompanisë publike “Srbijagas”, ndërsa Nenad Popović është kryetar i Partisë Popullore Serbe.
Më herët gjatë ditës, kryetari i Partisë Demokratike, Srđan Milivojević, kishte publikuar një pyetje në rrjetin social “X”, duke ngritur çështjen se kush do të “arratisej drejt Moskës” me fluturimin e paralajmëruar për në orën 18:30. Megjithatë, ky postim ishte një koment politik dhe nuk përbën konfirmim se tre politikanët kanë udhëtuar me këtë qëllim.
Sipas raportimeve, aeroplani është kthyer në Beograd pasi aeroportet e Moskës kanë vendosur kufizime në trafikun ajror për shkak të sulmeve me dronë.
Dy aeroporte të kryeqytetit rus kanë pezulluar plotësisht uljet dhe ngritjet e aeroplanëve, ndërsa dy të tjera kanë kaluar në një regjim të veçantë të funksionimit.
Deri më tani, nuk ka konfirmim zyrtar për arsyen e saktë të kthimit të fluturimit dhe as për praninë e tre politikanëve serbë në bord.
