Dronët goditën të martën dy anije në Detin e Zi, pranë bregdetit të Bullgarisë, duke fundosur njërën prej tyre dhe duke shkaktuar operacione emergjente shpëtimi, tha kryeministri bullgar, Rumen Radev.
Ekipet e shpëtimit evakuuan të gjithë 15 anëtarët e ekuipazhit të anijes “Chelsea 3”, e cila lundronte nën flamurin e Maltës. Pesë prej tyre morën trajtim mjekësor për lëndime të lehta, bëri të ditur Radev në një video të publikuar në rrjetet sociale, raporton AP.
Nga anija e dytë, e cila u fundos, u shpëtua një anëtar i ekuipazhit. Radev nuk dha detaje të tjera për personat që ndodheshin në bord.
Gjatë një mbledhjeje urgjente të Këshillit të Sigurisë të Bullgarisë, Radev i cilësoi sulmet si “absolutisht të papranueshme” dhe tha se vendi po kërkon ndihmën e NATO-s dhe Bashkimit Evropian.
Autoritetet bullgare nuk kanë prova të qarta për përgjegjësit e sulmeve me dronë.
Megjithatë, Radev tha se, sipas tij, “logjika tregon se rezultati është në favor të Federatës Ruse”.
Ministri i Jashtëm i Ukrainës, Andrii Sybiha, fajësoi Rusinë për sulmet. Në një reagim në platformën X, ai tha se goditja e anijeve tregtare pranë ujërave territoriale të Bullgarisë, ku u plagosën shtetas ukrainas dhe azerbajxhanas, dëshmon edhe një herë shpërfilljen e qëllimshme të Moskës ndaj jetëve të civilëve dhe sigurisë detare në Detin e Zi.
Sybiha tha se Ukraina po u kërkon partnerëve të saj të shtojnë presionin ndaj Rusisë, të forcojnë sanksionet dhe të ndërmarrin masa vendimtare për ta mbajtur atë përgjegjëse, si dhe për të mbrojtur lirinë e lundrimit.
“Deti i Zi është jetik për sigurinë ushqimore globale. Rusia po e sulmon për ta përdorur urinë si armë dhe për ta mbajtur botën peng” ka theksuar ai.
Edhe presidentja e Komisionit Evropian, Ursula von der Leyen, i dënoi ashpër incidentet me dronë, duke thënë se Deti i Zi është shndërruar në një tjetër front të përshkallëzimit të luftës së Rusisë kundër Ukrainës.
“Kjo është e papranueshme. I dënoj ashpër sulmet me dronë ndaj anijeve tregtare pranë bregdetit bullgar, të cilat rrezikuan seriozisht jetën e ekuipazheve dhe sigurinë në Detin e Zi”, shkroi ajo në X.
Von der Leyen shprehu mbështetjen për Bullgarinë dhe falënderoi ekipet e shpëtimit për reagimin e shpejtë, duke theksuar se përgjegjësit duhet të mbajnë përgjegjësi.
Sulmet e së martës ndodhën saktësisht një javë pas goditjes me dronë detarë dhe ajrorë të dy anijeve të tjera tregtare brenda zonës ekskluzive ekonomike të Bullgarisë në Detin e Zi.
Njëra prej tyre, që lundronte nën flamurin e Togos, u fundos, ndërsa një traget bullgar evakuoi 18 anëtarët e ekuipazhit të anijes tjetër, e cila lundronte nën flamurin e Palaut.
Presidenti ukrainas, Volodymyr Zelenskyy, deklaroi se ushtria e Ukrainës nuk kishte kryer operacione pranë vendeve ku ndodhën sulmet e javës së kaluar, duke fajësuar Rusinë.
Një ditë më parë, një anije mallrash në pronësi turke, e cila transportonte misër, mori flakë pas një sulmi me dronë dhe më vonë u fundos në Detin e Zi, pranë brigjeve të Rumanisë. Autoritetet rumune njoftuan se dy persona humbën jetën, ndërsa 11 anëtarë të ekuipazhit u shpëtuan.
Rusia nuk kishte reaguar menjëherë ndaj incidentit të së martës.
