Aco Velkovski, koordinator i LSDM-së në Njësinë e Tretë Zgjedhore, ka ngritur çështjen se sa nga pasuritë natyrore dhe ekonomike të Maqedonisë u kthehen realisht qytetarëve.
“KEMI NJË VEND TË PASUR. PSE POPULLI ËSHTË GJITHNJË E MË I VARFËR?”, shkruan Velkovski, duke iu referuar energjisë elektrike, ujit, tokës, pasurive minerale, infrastrukturës dhe kompanive që krijojnë fitim si pjesë e burimeve dhe potencialit ekonomik të shtetit.
Ai shtron pyetjen se kush përfiton nga pasuria që krijon Maqedonia dhe nëse një pjesë e burimeve strategjike dhe kompanive duhet të jetë në pronësi publike, me menaxhim profesional, transparencë dhe në funksion të interesit të qytetarëve.
“Sa nga pasuria e Maqedonisë mbetet realisht tek qytetarët e saj?”, pyet Velkovski.
Në postimin e tij, ai ngre edhe një çështje më konkrete: nëse kthimi i një pjese të ish-kompanive shtetërore në pronësi publike do të mund të siguronte më shumë mjete për shëndetësinë dhe arsimin, si dhe paga më të larta, pensione më të larta dhe standard më të mirë jetese.
“Nuk them se kjo është e vetmja përgjigje. Por mendoj se është një çështje për të cilën ia vlen të diskutojmë seriozisht”, shprehet Velkovski.
Postimin e përfundon me mesazhin: “Mirëmëngjes. Dhe një ditë të bukur për të menduar.”
