Kremlini ka konfirmuar se po zhvillohen diskutime për mundësinë e transferimit të sistemeve ruse të mbrojtjes ajrore S-400 të Turqisë drejt një vendi të tretë, një lëvizje që mund të ndikojë në mosmarrëveshjen mes Ankarasë dhe Washington-it për avionët luftarakë F-35.
“Po bëhet puna përkatëse dhe po zhvillohen kontaktet e nevojshme”, deklaroi Peskov, kur u pyet për mundësinë e transferimit të sistemeve.
Deklarata vjen pasi ministri i Jashtëm rus, Sergei Lavrov, tha se Moska mund të shqyrtojë lejimin e transferimit të S-400 drejt një shteti tjetër.
Sipas Lavrov, çdo vend që do të merrte sistemet duhet të vepronte në mënyrë të përgjegjshme dhe të ruante marrëdhënie miqësore me Rusinë. Moska, tha ai, do ta shqyrtonte një transferim të tillë nëse do t’i paraqitej një kërkesë.
Turqia ra dakord për blerjen e S-400 nga Rusia në vitin 2017 dhe i mori sistemet në vitin 2019. Vendimi shkaktoi kundërshtime nga Shtetet e Bashkuara dhe aleatë të tjerë të NATO-s, të cilët argumentuan se përdorimi i sistemit rus krijonte rreziqe për sistemet e mbrojtjes së Aleancës dhe programin F-35.
Washingtoni më pas e përjashtoi Turqinë nga programi F-35 dhe vendosi sanksione ndaj saj në kuadër të ligjit CAATSA.
Ankaraja ka kërkuar prej kohësh zgjidhjen e mosmarrëveshjes dhe rikthimin në programin F-35.
Sipas raportimit, Presidenti i Shteteve të Bashkuara, Donald Trump, deklaroi gjatë samitit të NATO-s në Ankara në korrik se po shqyrtonte mundësinë e rikthimit të Turqisë në program.
“Ne do t’i heqim sanksionet. Nuk duam të sanksionojmë miqtë tanë”, deklaroi Trump.
