Mickoski tha se qytetarët nuk kanë shpenzuar asnjë denar për festën. Që të nesërmen, kur i nxorëm dokumentet, u bë e qartë se është marrë vendim për shpenzimin e 5.5 milionë eurove nga paratë publike, në mënyrë jotransparente dhe në shkelje të Ligjit për furnizime publike. Mickoski po i gënjen qytetarët, ai erdhi në pushtet me gënjeshtra dhe vazhdon të qeveris me gënjeshtra, tha sonte kryetari i LSDM-së, Venko Filipçe.
Në emisionin “Vetëm intervistë” në televizionin Kanal 5, Filipçe akuzoi pushtetin se ende i fsheh kontratat, anekset dhe kompanitë me të cilat Lotaria Shtetërore ka lidhur kontrata.
“Nuk bëhet fjalë vetëm për një kompani. Gjëra të tjera do të dalin në dritë. Ka disa kompani me të cilat Lotaria ka nënshkruar kontrata. Vetëm për një ditë, nga deklarata se nuk është shpenzuar asnjë denar, arritëm në 5.5 milionë euro të shpenzuara në mënyrë jotransparente. Kryeministri po i gënjen qytetarët”, theksoi Filipçe.
Ai tha gjithashtu se paratë e Lotarisë Shtetërore janë para të shtetit dhe të popullit, pavarësisht përpjekjeve të qeverisë për të manipuluar teknikisht se ato nuk janë paguar direkt nga Buxheti.
Sipas Filipçes, rasti me festën është vetëm një shembull tjetër i mënyrës se si funksionon pushteti.
“Paratë e popullit përfundojnë te një numër i vogël kompanish të afërta me VMRO-GKO. Kjo tashmë shkon përtej konceptit të luftës politike. Kjo është një grabitje e shtetit. Mickoski erdhi në pushtet me gënjeshtra dhe vazhdon të sundojë me gënjeshtra. Pyetja është: a i beson ende dikush?, tha Filipçe.
Ai theksoi se kjo nuk është gënjeshtra e parë e Mickoskit, por një vazhdim i politikës me të cilën ai erdhi në pushtet.
“Mickoski erdhi në pushtet me gënjeshtra. Gënjeu se do ta rikthente emrin dhe se do ta anulonte Marrëveshjen e Prespës. Gënjeu se do të siguronte një kornizë më të mirë negociuese dhe një pozicion më të mirë me Evropën. Gënjeu se protokollet nuk ishin pjesë e negociatave, dhe pastaj pranoi se ato ishin pjesë e kornizës negociuese. Gënjeu gjithashtu se identiteti ishte i kërcënuar, dhe u konfirmua se identiteti maqedonas mbrohet nga Marrëveshja e Prespës. A i beson ende dikush një njeriu të tillë?, tha kryetari i LSDM-së.
Ai u ndal edhe te problemi me blerjen e rrushit, i cili, siç theksoi, do të ishte zgjidhur me 5.5 milionë euro.
“Qeveria shpenzoi 5.5 milionë euro për Dejvid Getën, në kushte kur vreshtarët po përballen me probleme serioze me blerjen e rrushit. Pse nuk u shpenzuan 5.5 milionë euro për fermerët? I gjithë problemi me blerjen, tani të rrushit, do të ishte zgjidhur me 5.5 milionë euro, ndërsa tani rrushi po kalbet në plantacione. Blerësit nuk po e blejnë rrushin dhe Qeveria nuk ka asnjë masë dhe nuk po reagon fare”, tha Filipçe.
Në intervistë, ai vlerësoi se situata në bujqësi është pjesë e krizës më të gjerë në të cilën ndodhet vendi.
“Kriza financiare dhe ekonomike në të cilën ndodhemi, huamarrja e tepërt, si kurrë më parë që nga pavarësia, gati 12 miliardë euro, dhe Qeveria e VMRO-së trashëgoi 8 miliardë euro borxh, standardi i ulët dhe varfërimi i qytetarëve, problemet dhe katastrofa që po ndodh në çdo sektor, në bujqësi, në arsim dhe kujdes shëndetësor, besoj se është një periudhë kaq kritike sa duhet t’i kushtojmë shumë vëmendje dhe të flasim me shumë kujdes, sepse është e mundur që vendi të lëvizë plotësisht në një drejtim në të cilin nuk kemi lëvizur që nga viti 1991”, tha Filipçe.
