Christopher Nkunku thyen heshtjen pas largimit të tij të papritur nga Milani.
Në prag të sfidës së Champions League mes Comos dhe RB Leipzig, sulmuesi francez është ndalur të flasë për eksperiencën e tij me kuqezinjtë, e cila zgjati vetëm një sezon përpara se trajneri i ri, Ruben Amorim, ta zbriste në ekipin rezervë.
Më pak se dy javë nga lamtumira e tij, 28-vjeçari rikthehet në Itali. Nkunku, i transferuar te Leipzig në formë huazimi me të drejtë blerjeje (jo të detyrueshme), do të përballet me Comon në ndeshjen e parë të fazës së grupeve të Ligës së Kampionëve. Gjatë konferencës për shtyp, ai reflektoi mbi largimin e tij surprizë nga Milani, klub i cili në verën e vitit 2025 shpenzoi plot 37 milionë euro (plus 5 milionë bonuse) për ta afruar, duke e bërë atë blerjen më të shtrenjtë në historinë e kuqezinjve në atë kohë.
“Për të respektuar një vendim, nuk është gjithmonë e nevojshme ta kuptosh atë,” deklaroi lojtari i kombëtares franceze. “Gjithçka ndodhi papritur. As unë vetë nuk e prisja. Nuk e justifikoja dot këtë vendim, pasi zhvillova një sezon të qëndrueshëm dhe pa lëndime.” Largimi i tij bëri vërtet shumë bujë në Itali. Me një mesatare prej 0.46 golash për çdo 90 minuta të luajtura, Nkunku ishte lojtari më efikas i Milanit gjatë sezonit të kaluar. Megjithatë, me ardhjen e trajnerit Ruben Amorim, situata ndryshoi dhe në fund të merkatos francezi u dërgua te rezervat.
“Nuk është kurrë e lehtë ta gjesh veten në një situatë të tillë. Nuk mund t’ju them arsyen pse ndodhi, sepse e theksoj: as unë nuk e kuptova vendimin. Gjithsesi, e respektoj zgjedhjen dhe i uroj Milanit një sezon të mbarë. Sot jam i lumtur që jam te Leipzig. Kisha edhe mundësi të tjera në tavolinë, por rikthimi këtu ishte prioriteti im i vetëm,” përfundoi Nkunku. Kujtojmë se sulmuesi francez ka shkruar historinë me klubin gjerman, duke shënuar 70 gola në 172 ndeshje në periudhën mes viteve 2019 dhe 2023.
