Çfarë ngjyre është kanceri i lëkurës? Ja çfarë vëmendje duhet t’u kushtoni lythave…
Kanceri i lëkurës shpesh njihet nga shfaqja e një lythi të ri ose nga ndryshimi i një lythi të vjetër.
Nëse lythi rritet, ndryshon formë ose ngjyrë, kruhet ose dhemb ose nuk është më simetrik, duhet të vizitoheni menjëherë te mjeku juaj.
Çdo shenjë inflamacioni në lyth është gjithashtu një simptomë e mundshme e kancerit, transmeton Telegrafi.
Lythi që shndërrohet më shpesh në kancer është ai që ka tri ose më shumë nuanca ngjyrë kafeje dhe të zezë. Gjithashtu, nëse shfaqet një njollë nën thua, dhe ju e dini se nuk ka pasur lëndime, duhet të bëni një kontroll mjekësor.
Statistikat tregojnë se melanoma shfaqet më shpesh te meshkujt në gjoks, ndërsa te femrat, në këmbë dhe kurriz.
Kanceri i lëkurës shihet më së shpeshti në zonat e ekspozuara ndaj diellit të lëkurës tuaj – fytyrën tuaj (përfshirë buzët), veshët, qafën, krahët, gjoksin, pjesën e sipërme të shpinës, duart dhe këmbët.
Megjithatë, kanceri i lëkurës mund të zhvillohet edhe në zona më pak të ekspozuara ndaj diellit dhe më të fshehura të lëkurës, duke përfshirë midis gishtërinjve, poshtë thonjve, në pëllëmbët e duarve, shputat e këmbëve dhe në zonën gjenitale.
Personat me lëkurë të bardhë apo me quka, flokë biondë apo të kuq, dhe me sy blu ose të kaltër, i përkasin kategorisë me faktorë rreziku të lartë, ndërsa personat me flokë dhe sy të zinj, lëkura e të cilëve nuk digjet normalisht në diell, i përkasin kategorisë së personave me rrezik mesatar për t’u prekur nga kanceri i lëkurës.
