Partitë politike shqiptare në zgjedhjet e ardhshme parlamentare do të rreshtohen në tre blloqe. Kështu tha gazetari dhe themeluesi i Flaka Media Group, Driton Zenku në emisionin “Politica” në televizionin Globi.
“Opozita shqiptare nuk pres të zgjerohet (LD, AAA, BESA), ndoshta do të ju bashkohet edhe ndonjë shoqatë. Aleanca për Shqiptarë duke i dëgjuar eksponetët e saj, së fundmi edhe liderin e partisë (Arben Taravari), ata do të dalin vetë në zgjedhje. BDI siç tha edhe Ali Ahmeti mundet ti bashkoheni disa nga partitë më të vogla shqiptare (LP dhe PDE), pra i shoh se do të kemi tre blloqe në zgjedhjet e ardhshme parlamentare te shqiptarët”, deklaroi Zenku.
Në këto rrethana siç e kemi skenën politike është e vështirë të krijohet eufori te opozita shqiptare, tha ai, ndërsa në studio ishte bashkë me deputetin e Lëvizjes Besa Fadil Zendeli për të folur rreth opozitës shqiptare.
“Në këtë moment nuk mund të mendohet se opozita i fiton zgjedhjet derisa edhe ASH nuk merr akoma qendrim nëse ju bashkohet, dhe kësaj ia shtojmë edhe rejtingun në bazë të sondazheve kredibile, BDI mbetet e para”, shtoi më tej Zenku.
Ai tha se nëse ASH del nga qeveria, me 8 deputetë ajo do zë vendin e opozitë shqiptare, duke marrë parasyshë se koalicioni Lëvizja Evropiane për Ndryshim ka 6 deputetë.
Gazetari Zenku, megjithatë tha se deri më tani opozita aktuale shqiptare (Gashi-Kasami-Mexhiti) kanë ecur mirë deri në këto momente.
Sipas parashikimeve të tija te blloku maqedonas zgjedhjet do ti fitojë VMRO-DPMNE-ja. Zenku tha se subjektet shqiptare që do qeverisin pas zgjedhjeve me partinë e Mickoskit duhet të kenë kushtet e tyre sikurse Marrëveshjen e Ohrit, Marrëveshjen e Presës dhe atë për Fqinjësi me Bullgarinë, pasi partia opozitare maqedonase ka theksuar se do ti rishikojë këto marrëveshje. Ato, sipas tij, nuk mund të negociohen më pasi dëmtojnë rëndë vendin në orientimin euro-atlantik dhe në marrëdhëniet ndëretnike brenda në shtet.
